I. 038-068
Māi̬ɣ tå̄rmi̬ɣ så̄sχati̬ləm ēri̬ɣ
Ness tēləm taŋkw-śaχl ūsēnt,
ness tēləm tunrä-śaχl ūsēnt
Sårni-Śiś, Sårni-Kworəs
ēkwäi̬ɣ, å̄jkäi̬ɣ å̄lei̬ɣ.
Sårni-Kaltəś, Sårni-å̄tər
āɣiji̬ɣ pī̬ɣi̬ɣ å̄ńśei̬ɣ.
χå̄təl-χansäp sāt luwiŋ kwol å̄ńśei̬ɣ,
tå̄rəm-tūjt sāt luwiŋ kwol å̄ńśei̬ɣ.
kwol-sisänəlt
sårniŋ lūptap χāĺ tēləs,
sårniŋ tåwpä χāĺ tēləs.
Sårni-Kaltəś jäɣᵊ-āɣitä
kwonä kwāli, saɣä tārəmti:
akwᵊ sūntəp sāt Ās åuməli,
akwᵊ sūntəp sāt śāriś χuĺi̬li;
taw saɣänəl χå̄təl pokapi,
taw saɣänəl ēt-pos χuĺi̬li.
kwol sisät ĺūli
sårniŋ lūptap, sårniŋ tåwpä χāĺnə
sårniŋ tåwləp, sårniŋ på̄nsip
sāt kukkuk iseɣit;
ētä sāt lujɣeɣit,
χå̄təlä sāt lujɣeɣit;
ētä-kās at χå̄li,
χå̄təlä-kās at χå̄li;
tī̬ĺə lujɣäseɣit: sūpänänl
śāli å̄lnəl toχ ta så̄sχateɣit,
tūĺə lujɣäseɣit: sūpänänl
sårniŋ å̄lnəl toχ ta så̄sχateɣit.
mā jänitəl å̄lnə
sawiŋ ńaräp, sawiŋ sāχip
ēləm-χåləsakätä ta rēɣi̬kwəl
ań ti χå̄təl-mos ta ūnleɣit.
Sårni-å̄tər jäɣi̬-pī̬ɣä
kwonä kwāli, saɣä tārəmti:
akwᵊ sūntəp sāt Ās åuməli,
akwᵊ sūntəp sāt śāriś χuĺi̬li;
taw saɣät χå̄təl tot ĺūĺi,
taw saɣät ēt-pos tot ĺūĺi;
sāt Ās, sāt śāriś pattanəl
sårniŋ sispä sāt χåmləχ
nåŋχ χuĺi̬taχteɣit;
taw saɣänəl sisänl isi̬leɣit.
taw saɣä jå̄rəl tūw å̄li, tāl å̄li.
mā jänitəl å̄lnə
sawiŋ ńāräp, sawiŋ sāχi̬p
ēləm-χåləsakätä ta rēɣi̬kwəl
ańiŋən χå̄təliŋən ta ūnleɣit.
χåsä å̄lsi̬ɣ, man wāt́i å̄lsi̬ɣ,
akwᵊ-ērt Sårni-Śiś śāńēn ti pōsäls.
Sårni-Kaltəś āɣitä kwonä kwāləs,
sårniŋ tåwləp, sårniŋ ponsip
sāt kukkukänəl akwä pūumäts,
sorɣä pali̬ɣ manəmtəstä,
śāńä kukkuk-kiwərnə tū pinəstä.
χåsä å̄lsi̬ɣ, man wāt́i å̄lsi̬ɣ,
akwᵊ-ērt Sårni-Kworəs jäɣēn ti pōsäls.
Sārni-å̄tər pī̬ɣä kwonä kwāləs,
sårniŋ sispä sāt χåmlaχnəl
akwᵊ χåmləχ puumäts,
pukitä pali̬ɣ manəmtəstä,
āśä χåmləχ-kiwərnə tū pinəstä.
Ness tēləm tāŋkw-śaχl ūsēnt,
ness tēləm tunrä-śaχl ūsēnt
χåsä å̄lsi̬ɣ, man wāt́i å̄lsi̬ɣ,
akwᵊ-ērt Sårni-Kaltəś āpśitä -nūpəl lāwi:
«apśikwə, ness tēləm taŋkw-śaχl, tunrä-śaχl ūsmēnt
mēɣi̬ɣ ēləm-χåləstal χåsä, wāt́i ūnlimēn?
χoti mat nājiŋ mān, å̄təriŋ mān
mēɣi̬ɣ ań woss minnuwəmēn!»
āpśitä jäɣᵊ-āɣitä -nūpəl lāwi:
«mēɣi̬ɣ manər jå̄rəl minimēn?»
Sårni-Kaltəś jäɣᵊ-āɣitä lāwi:
«pēs śāńäɣəmēn, āśäɣəmēn å̄ləm porät
χå̄təl χansäp sāt lūwiŋ kwol å̄śsi̬ɣ,
tå̄rəm-tūjt sāt luwiŋ kwol å̄śsi̬ɣ.
ta luwiŋ kwolt patitən jäläkən;
mōləχ lūt å̄ləm porät ńawər ūnttəlawəs,
ań ńawər jurtanän jol jäli̬lawəs,
naŋ lū-kwol-pattät mā χi̬läkən,
assin ĺūĺit mā χi̬lnən jui-pālt χå̄ntilən!»
Sāt luwiŋ kwol patitən
Sårni-å̄tər ta mini, ti χi̬li.
assin ĺūĺit mā χi̬lnätä jui-pālt
ań ńawər ti χå̄ntəstä.
mat jist, ūnttəlimätä porät
pēś χansäŋ, ńārəm χansäŋ
ńawər-pī̬kwə å̄ləm, –- ness āt́i å̄ləm:
ań woss åsä mān ta χanimə.
χå̄ləm ńawər-pī̬ɣ jūw ti totitä.
Sårni-Kaltəś jäɣᵊ-āɣitän ti wojwəs;
akwᵊ pālä tūr-witəl låutəstä,
akwᵊ pālä Ās-witəl låutəstä,
nå̄ŋχ ti lilejəptuwəs.
ness āt́im, -– ta χurip uj ti å̄ləm:
akwᵊ pāl ńol-sam-asänəl
uĺä-sultməl pājtaχti,
akwᵊ-pāl ńol-sam-asänəl
posiməl pājtaχti.
kātäɣä kit pālt tåwläɣä tot.
ness at́im, –- ta χurip uj ti å̄ləm:
ńārəm χansäŋ, pēś χansäŋ
tåwliŋ lūw ĺūĺnät-mūs,
χotäĺ jå̄ŋχi, nājiŋ mā jänitəl
paĺkätä pusən ta χå̄ntəli;
kit pum akwän χå̄ji:
pusən taw paĺän sujti,
kit ńir akwän χå̄ji:
pusən taw paĺän sujti.
sāt kuńäspä kuńäsiŋ inär
luwēn sisän ti nortei̬ɣ,
lūw-sis tarməl sas ti tālei̬ɣ.
kit tå̄rəm, kit kworəs χalən
nå̄ŋχ ta laplawəssi̬ɣ;
kēmpliŋ sāχi kēmpliänän
toχərmätēn-sis
mōt χum ūnlənə nājiŋ tårəmnə patsi̬ɣ,
mōt χum ūnlənə å̄təriŋ tå̄rəmnə joχtsi̬ɣ.
χåsä ta minəsi̬ɣ, aman wāt́i minəsi̬ɣ
akwᵊ māt joläĺ suskätēn
kis lakw minəm lakwiŋ mākätēn
uĺäŋ witən χuĺi̬limə,
peśatiŋ sāt tal ĺūlitəl
uĺä ńelmä χossi̬χati.
å̄s χasä ta minəsi̬ɣ, aman wāt́i minəsi̬ɣ,
akwᵊ-mat-ērt χå̄ntmēnt
ań kātä sårniŋ jelpiŋ ujkätēn
kāt-taĺχanä, laɣi̬l-taĺχanä
jelpiŋ śakwən pusən śarrimət.
Sårni-å̄tər kēntä χot ti ālmejəstä,
saɣäɣä kwon ta tārmatsäɣä,
tūl ēläĺ ta minei̬ɣ.
akwᵊ-mat-ērt jolä χå̄ntmēnt
ness āt́im, –- wōr-jiw at χuĺtəm,
mātä-pəl jortal akwäi̬ɣ at nāŋki.
toχ å̄s ēläĺ ta minəsi̬ɣ.
akwᵊ māt Sårni-å̄tər nåmsi:
«ēləm-χåləstal mā χumĺə toχ ūnli?!
matər-sir ūrəl ēləm-χåləs woss tēlnuw!»
ań śāńäɣä, āśäɣä ūsəm mātēnnəl
ĺūńśimə ti kāstiäɣä:
«Sårni-Kworəs jäɣi̬kəm, Sårni-Śiś śāńkəm!
am ås ēləm-χåləstal man ūrəl ūnleɣim?»
Sårni-Kaltəś jäɣ-āɣitä lāwi:
«āpśikwə! χumĺə jēmtsən, manəräi̬ɣ ĺūńśeɣin?»
«å̄s am, jäɣ-āɣikwə, tōnä ĺūńśeɣim:
ūnləp jelpiŋ māt
jelpiŋ śakw ta χuĺi̬lāləm;
wōr-jiw-aul at ari̬təm,
ēləm-χåləs at ari̬təm;
ēləm-χåləsakwətal man ūrəl å̄leɣim?!» –-
«āpśikwə, joläl sussən sar!»
joläĺ kwoss āŋkwäti:
ań-mań akwᵊ māt sāt-pis χāpɣä-jiw χāpət
ēkwäi̬ɣ å̄jkäi̬ɣ å̄lei̬ɣ.
jelpiŋ witən χuĺi̬lālim tå̄simei̬ɣ;
uś ti nå̄ŋχ ĺūĺei̬ɣ, kwonä ti ūssulei̬ɣ,
ēkwä sori̬ɣ-kiwərnəl Χuĺ-å̄tər kwon kwāləpi.
ań pukńit jäktim ēləm-χåləs,
tēn å̄ńśəm āɣiänēn, pī̬ɣänēn
manki ti ruśä māńśitätəl
ań ti å̄ĺeuw.
Sårni Kaltəś, Sårni-åtər
pēś χansäŋ, ńārəm χansäŋ
tåwliŋ ujēntəl å̄s ti minəi̬ɣ.
χåsä minei̬ɣ, wāt́i̬ minei̬ɣ.
akwᵊ māt ēläĺ sunsei̬ɣ:
pauli̬ɣ lāwuŋkwə jäni̬ɣ,
ūsi̬ɣ lāwuŋkwə å̄s māńnū,
ta jänit paul ti nāŋki.
tū joχtsi̬ɣ;
ēləm-χāləs å̄lnə akwᵊ kwol å̄li,
lū å̄li, mis å̄li, pāĺä å̄li,
āmpər å̄li, sūmjəχ å̄li, lāpkä å̄li;
ēləm-χåləs jortal āt́im.
jäɣᵊ āɣitä āpśitä -nūpəl lāwi:
«naŋ śältäkən;
matər ēləm-χåləs kāsəleɣin, ānəm ul χōltäln;
χotəm å̄leɣim, woss å̄leɣim, ānəm ul nåwäln!»
Sårni-å̄tər jūw śälti,
ēləm-χåləs āt́im;
såriŋ tēp, māɣiŋ tēp
χūńtə wārimə, toχ ūnli.
åstal låwəś joli-pālnə śälti,
χot tūjtχati.
akwᵊ-mat-ērt tūlmaχ-å̄jkä śältapi,
kwol jänitəl karɣyimə ti sōltɣäli.
Sårni-å̄tər nåmsi:
ul tåumaχti am pāltəm;
akwᵊ-mat-ērt tūlmaχ-såwä
χot ti āŋχwi̬təstä.
nå̄ŋχ tī̬l kwoss χå̄ntitä:
ań-mań manä tēləm nāj-χum,
manä tēləm å̄tər-χum!
på̄χätur jol-ūntəlmatəs,
muńəm witä sēɣsālitä.
ton å̄rəmt āwi å̄s ti pūχtmawəs:
sāli-uj å̄jkä kapaj ti narmatəs,
kwol jänitəl karɣyimə ti sōltɣäli.
akwᵊ-mat-ērt sāli-uj såwä
χot ti āŋχwi̬təstä:
ań-mań manä tēləm nāj-χum,
manä tēləm å̄tər-χum!
å̄s på̄χätur jol ūntəlmatəs,
muńəm witä ti sēɣsālitä.
ton å̄rəmt å̄s ti āwi pūχtmawəs:
ań-mań uj-āńś å̄jkä ti narmatəs,
kwol jänitəl karɣyimə, χaślimə ti sōltɣäli.
akwᵊ-mat-ērt uj-āńś-såwä
χot ti lei̬ɣmatəstä:
ań-mań manä tēləm nāj-χum,
manä tēləm å̄tər-χum!
å̄s på̄χätur jol ūntəlmatəs.
χåsä ūnleɣit, wāt́i ūnleɣit, akwᵊ-ērt lāweɣit:
«taw ti kwolūt ēləm-χå̄ləs-śär å̄li;
taw å̄s χot å̄li? tī̬ɣ woss jiw!»
Ań Sårni̬-å̄tər nå̄ŋχ ti kwāləs,
χūrəm på̄χätur jot ti paśälaχts,
tī̬l såriŋ tēp, māɣiŋ tēp pasännə ūntsət.
χåsä, man wāt́i tēst, ajist,
akwᵊ-mat-ērt Sårni-å̄tər naməlmatəs:
«Sårnikwə! am tēɣəm, ajeɣim,
ań jäɣᵊ-āɣim kwon, simä ta ētχəlawə.»
ton å̄rəmt pāχäturət lāweɣit:
«naŋ-ås jäɣᵊ-āɣi-pəl ti å̄ńśmən?
juw wōwäln!»
Sårni-åtər Sårni-Kåltəś jäɣᵊ-āɣitä
jūw ti wōwəstä;
såriŋ tēp, māɣiŋ tēp pasännə ta ūntsət,
tēst, ajist, jol ta χujäst.
Namiŋ sāt χujäst,
sujiŋ sāt χujäst,
akwᵊ-mat-ērt Sårni-å̄tər
ūlmä jital ti patwəs.
nå̄ŋχ ti kwāləs, kwonä kwāləs,
puŋkä χotäĺ å̄ls,
ńolä χotäĺ å̄ls:
laɣi̬ləl akwäi̬ɣ ta mini;
jäɣ-āɣitä, luwä ta χuĺtsi̬ɣ.
χåsä tå̄rəm χåsäi̬ɣ minəstä,
wāt́i tå̄rəm wāt́äi̬ɣ minəstä,
akwᵊ māt χå̄təl-rēɣiŋ suj-wāta:
tū jolä χujəs.
χåsä χujəs, wāt́i χujəs,
tūjä-pāläi̬ɣ ti jēmts.
mortim å̄lnə saw ujkwə
ti pāl å̄lnə nājiŋ mān, å̄təriŋ mān
ti jiŋkwə patsət.
taw ań χujimätä ta sunsiänä:
akwᵊ-mat-ērt takkät nē-lunt
numəl ti mini.
Sårni-å̄tər markäɣä, kātäɣä ńuwəmtaptəs,
χum-lunti̬ɣ ēläĺ ti tī̬lämləs.
ań nē-luntēntəl nēɣi̬ɣ χummi̬ɣ
akwän jurśχatsi̬ɣ.
takwsi-pəl wāt́i χå̄təl wārəs-pəl
mortim sāmnə ta minəsi̬ɣ.
sårniŋ witəp sāt tūr,
sårniŋ witəp sāt śāriś,
ań mortim ujit tot ta å̄leɣit.
ētä sāt lujɣeɣit,
χå̄təlä sāt lujɣeɣit;
sårniŋ witəp sāt tūr, sāt śāriś-wātan
pā kwāleɣit: sårniŋ ĺå̄ŋχänl χuji,
nal waɣi̬leɣit: sårniŋ ĺå̄ŋχänl åuti.
Sårni-å̄tər ań nē-luntätəl
akwᵊ ta māt ti å̄lei̬ɣ,
āɣiji̬ɣ, pī̬ɣi̬ɣ å̄śsi̬ɣ.
Numi-Tå̄rəm jäɣēn,
Numi-Tå̄rəm āśēn
tūjäi̬ɣ ti jēmts.
mortim å̄lnə saw ujkwə
ti mā å̄lnə nēŋ witən,
ti mā å̄lnə χumiŋ witən, –-
nåmtiŋ uj nåmtänl
pusən tī̬ĺe ta pats.
tēn å̄s ti jissi̬ɣ.
ti mā ålnə nājiŋ mān joχtmēnt,
ti mā å̄lnə å̄triŋ mān joχtmēnt
ań luwä ta nåməlmatəstä,
χotäĺ minnə luwä āt́im.
takwsi-pəl wāt́i χå̄təl wārəs-pəl,
mortim å̄lnə saw ujkwə
mortim nē nēŋ witən
mortim χum χumiŋ witən,
tūĺə ta minmi̬täst.
Sårni-å̄tər ań mōlti χujəm
χå̄təl-rēɣiŋ suj wātatän joχts.
tū jol ta χujəs, tot ta χuĺtəs;
lunt-nētä, āɣiäɣä pī̬ɣäɣä jot
ēläĺ ta tī̬ləmläst.
ētä sāt ta χuji,
χå̄təlä sāt ta χuji.
χå̄təl-rēɣiŋ suj wātatät
χåsä å̄ləmä jui-pālt,
man wāt́i å̄ləmä jui-pālt
tūjä-pāläi̬ɣ ti patəs.
mortim å̄lnə saw ujkwə
ås ti pāl nājiŋ mān ti jiŋkwə patsət,
ås ti pāl å̄təriŋ mān ti jiŋkwə patsət.
mortim ujit ta-kwoss mineɣit,
ēkwatä ńaurəmaɣä ti-kwoss ūriänä:
ań ēkwatä ńaurəmaɣä āt́imət.
akwᵊ-mat-ērt wās-uj-χul ti ojipuŋkwə patsət.
lunt-uj-χul ti ojipuŋkwə patsət.
jui-ault ań lunt-ēkwatä
ĺūńśim ti nēi̬ləs.
å̄jkätä āt́im, ńaurəmaɣä āt́imei̬ɣ:
å̄jkätä ĺūńśäti, ńaurəmaɣä ĺuńśäti.
ĺūńśkätä lāwi:
«mortim nē nēŋ wittə,
mortim χum χumiŋ wittə
sårniŋ nē, mortim-mā-āɣi å̄li.
mōl tēli tāl-sim aśərmat
χotäĺ å̄lnə mortim uj
pusən taw sānsän χāŋχeɣit:
am ńaurəmakäɣəm tāl-sim aśərmat
sānsnəl kwonä pūχtmawəssi̬ɣ,
aśərmän tittimei̬ɣ.
kwossa-pəl å̄s ńaurəmakäɣəm āt́imei̬ɣ:
å̄jkəm woss χå̄ntnūm,
å̄trəkəm woss χå̄ntnūm!»
ań lunt-nētä ti mān ta jis.
takwsi-pəl wāt́i χå̄təl wārəs-pəl,
mortim å̄lnə saw ujkwə
ań mortim nē nēŋ witənälən,
ań mortim χum χumiŋ witənälən
å̄s ta nåməlmatsət.
Sårni-å̄tər nētä ĺūńśim å̄s ti mini.
χå̄təl-rēɣiŋ suj-wātan joχtmätä
ĺūnśimə lāwi:
«ań mōləχ ātərakəm
āɣi å̄ńśəm, pī̬ɣ å̄ńśəm
jåməs ātərakəm, –-
ti māt luwä ta tå̄pməs,
ti māt ńåwlä ta sais!»
ti å̄s toχ ta minəs.
ēkwatä minəm jui-pālt
ti kantməltaχtuŋkwə pats.
nåmsi: «ań mōləχ āɣiäɣəm-pī̬ɣäɣəm
aśərmän ta tittimätēn lāwəlti;
sar am taχ joləl man numəl
tū patməm å̄rəmt,
sårniŋ nē namən akwᵊ ti på̄χən pati.»
Sårni-å̄tər ta χajti, ta χajti.
χåsä χajtəs, man wāt́i minəs, –-
ja, man å̄rəmt joχti?!
akwᵊ māt waɣi̬tal ti pats.
«ja, tauli! –- å̄s χujeɣim.»
tå̄rəm-mān tēləm jäni̬ɣ aχwtəs tarməl
tū ti χujəs.
χåsä χujəs, man wāt́i χujəs,
nåmsaχti: taw am mōläl lū å̄śsəm!
«eχ-jā! ań Śiś-Sårni śańkəm jåmi̬təm
χå̄təl χansäŋ sāt luwiŋ kwol pattamnəl,
Kworəs-Sårni-āśkəm ūnttāləm
tå̄rəm-tūjt sāt luwiŋ kwol pattamnəl
ńārəm χansäŋ mōləχ,
pēś χansäŋ mōləχ
tåwliŋ lū jänməltāləs.
χot å̄lnə mākänəl
ērɣəm-ke ēlä minnūw,
mōjtəm-ke ēlä minnūw,
numəl patnə rakw-sam,
numəl patnə wōt-sam
tī̬ɣ woss patnūn!»
ton å̄rəmt śama ta taχəs.
χåsä χujəs, man wāt́i χujəs,
akw-ērt χå̄ntəli:
pajt-pālä manärən wotentawə.
samäɣä pal-punsiäɣä,
ań-mań luwän ti ńolentawə.
ja, nå̄ŋχ tūl ti sajkäləs,
luwä sisän ti tālmatəs.
akwᵊ pāl å̄lnə śērmatä ńuwi̬takätä:
akwᵊ pāl å̄lnə tå̄rəm-pāl å̄ln-turəl lujɣyi;
mōt pāl å̄lnə śērmatä ńuwi̬takätä:
mōt pāl å̄lnə tå̄rəm-pālt χå̄təli̬ɣ, jå̄ŋχpi̬ɣ χuĺi̬leɣi̬.
kis-lakw jå̄ŋχəm lakwiŋ mā ta jå̄ŋχitä;
ań mortim nē nēɣiŋ mān ti nēi̬ləs,
ań mortim χum χumiŋ mān ti nēi̬ləs.
ań-mań ta sårniŋ witəp sāt śāriś
mortim ujä ta-kēm saw ti:
mā ness ńåusānti,
śāriś ness lēntɣenti.
ta ĺapänū joχtəs-pəl
paĺätəl ti χå̄ntəmləsanä:
lēntiŋ tå̄rəm ta lēntəltāntawə,
χumpiŋ tå̄rəm ta χumpəltāntawə.
pūmaśä ētä sāt at χå̄li,
pūmaśä χå̄təlä sāt at χå̄li.
sunsitä: ań mortim āɣi, sårniŋ nē ūnli;
taw på̄χän sunsi:
lunt-āɣiriśäɣä, pī̬riśäɣä
χumĺe ūsmi̬ɣ χujei̬ɣ.
ań tåwliŋ sāt num-pālt ūnlənə,
laɣi̬liŋ sāt num-pālt ūnlənə
Tå̄rəm tārätim jelpiŋ kēntä
sami̬ɣ pasən ta lakwäsəs.
luwä -nūpəl ti lāwi
«ań mortim nē ūnlənə mān
lūm, tūl tārä ta minäkən!
kātən χumĺə toti̬peɣin:
ta sårniŋ nē luwä
ta sāmən woss kūläti;
laɣi̬lən χumĺə toti̬peɣin.
ta sårniŋ nē ńawĺä
ta sāmən woss kūläti!»
tōn å̄rəmt ań nētän ti kāsəlawə;
sāt ēnkajänän lāwi:
«tū sunsän!
kit tå̄rəm, kit kworəs-χal pasəl
å̄tər ti jinätä nāŋki;
ānəm χummi̬ɣ å̄śnə wēśpä χum
χotä pātəri?!»
Sårni-å̄tər ti jiw.
ań sårniŋ nē ēnkajänän lāwi:
«ta lūw kāt-laɣi̬l tūśtnə mā
ńilä å̄ln-ānil ūnttəlän!»
Sårni-å̄tər tī̬ɣ ti joχts.
lūw kātä-laɣi̬lä ań å̄ln-ānit kiwərnə
tū ta tūśtχatäst,
ań å̄ln-ānit lūw tå̄ŋχ-pattän
tū ta χanujäst.
χajtmä-mūs ań sårniŋ nē
takwi å̄ln-āni-sēlänän
luwä sāt mān ti manəmtawəs,
ńåwĺä sāt mān ti manəmtawəs.
Sårni-å̄tər toχ ta tārä mini;
ań āɣiriśäɣä, pī̬riśäɣä
lunti̬ɣ ēlä tī̬ləmləssi̬ɣ.
Ań sårniŋ witəp sāt śāriśnəl
Sårni-å̄tər jūw ta jå̄ŋχi.
jäɣᵊ-āɣit nåmtən uś ta patwəs.
jäɣᵊ-äɣit χuĺtəm ūsən joχtmä å̄rəmtə
ań χåsä lei̬pä på̄χäturt akwäi̬ɣ jortal āt́imət.
ań tātəl ūsət pat jäɣᵊ-āɣitä takkät å̄li.
ań ńārəm χansäŋ, pēś χansäŋ tåwliŋ luwēnnə
sas å̄s ti tālsi̬ɣ.
kēmpliŋ sāχi kēmpliänēn toχərnätēn-sis
kit tå̄rəm-χalən nå̄ŋχ ta lapsi̬ɣ,
kit kworəs-χalən nå̄ŋɣ ta lapsi̬ɣ.
akwᵊ māt ēläĺ kwoss sunsei̬ɣ:
eχy-jā! ań ness tēləm taŋkw-śaχl ūsēn,
ness tēləm tunrä-śaχl ūsēn
tā nēi̬ləs. –-
ūsēnnə ti joχtsi̬ɣ, jūw śältsi̬ɣ;
såriŋ tēp, māɣiŋ tēp-pasän
tēssi̬ɣ, ajsi̬ɣ.
jäɣᵊ-āɣitä kwonä ta kwāli,
saɣä tārəmtitä:
akwᵊ suntəp sāt śāriś χuĺi̬li,
akwᵊ suntəp sāt Ās åuməli.
sårniŋ lūptap, sårniŋ tåwəp χāĺən
sårniŋ sårniŋ på̄nsip, sårni̬ tåwləp
sāt kukkuk iseɣit;
ētä sāt lujɣeɣit,
χå̄təlä sāt lujɣeɣit;
ētä kās at χå̄li,
χå̄təlä kās at χå̄li,
akwᵊ kukkuk pali̬ɣ manəmtəs,
Sårni-Śiś śāńä nå̄ŋχ ta ūnti.
ań Sårni-Śiś śāńēntəl jūw ta śältsi̬ɣ.
ań jäɣi̬-pī̬ɣä kwonä kwāli,
saɣä tārəmtitä:
akwᵊ suntəp sāt śāriś χuĺi̬li,
akwᵊ suntəp sāt Ās åuməli.
sāt Ās, sāt śāriś pattanəl
sårniŋ sispä sāt χåmləχ
nå̄ŋχ ta χuĺi̬leɣit.
akwᵊ χåmləχ pali̬ɣ manəmtəs,
Sårni-Kworəs āśä nå̄ŋχ ta ūnti.
ań Sårni-Kworəs āśēntəl juw ta śältsi̬ɣ.
sårni laɣi̬ləp pasännə ti ūntsət,
såriŋ tēp, māɣiŋ tēp tēst, ajsət.
Ań Sårni-Kaltəś, Sårni-å̄tər
Sårni-Śiś śāńēnnə,
Sårni-Kworəs āśēnnə
sårni kispä kit āpän χujiptawəssi̬ɣ,
sāt rūsip å̄ln-kwalɣəl å̄ltɣələssi̬ɣ,
ti joli mān ti tārätawəssi̬ɣ.
ti joli mān ti joχtsi̬ɣ; kwoss χotäĺ ēləm-χåləs āt́im. akwᵊ-ērt jäɣᵊ-āɣitä lāwi: «āpśikwe, tū-sunsən! ań moləχ jelpiŋ śakw wārilamət sātpis χāpχä-jiw-χāpəl tå̄si̬lim ēkwäi̬ɣ ājkäi̬ɣ tot tai̬ɣ!» tū ti minuŋkwə patsi̬ɣ. taw man tåwləl minei̬ɣ, aman laɣi̬ləl minei̬ɣ, man ås å̄li, tū ti joχtsi̬ɣ. ań ēkwäi̬ɣ å̄jkäi̬ɣ kwol ūnttəmi̬ɣ. wōr-jiwət jelpiŋ śakw minəmä jui-pālt ta jäniti̬ɣ ti jēmtsət: tī̬ĺə, tūĺə śēsɣəlimə ti ūnttəmanēn.
Ta ēkwäi̬ɣ å̄jkäi̬nəl tēləm āɣit-pī̬ɣət ańiŋən χå̄təliŋən ti å̄leɣit, i śuńeɣit.