Маниг олнэ пора
Туи пора
Касыӈ емт туи порат ман семьяв ворт олы. Ворт ман яныг пум каныт оньсев, тот сав пум варев. Касыӈ няврам такви яныт пум коснэ йив оньси, Мань няврам – мань ос купнит пум коснэ йивыл масьтырыг вараве. Яныг хотпат сав пум авкторыг сагрэгыт, титыт хотал ты пумыт, ёмасякв те тосэгыт, няврамытн консуӈкве та овылтавет. Тан мань купнат варегыт, ты купнат тувыл яныг хотпатн сапри тусьтын ман акван тотавет. Сапри карсыг, осьсяг ос хосаг вараве, туи ос таквсы сыс раквытын те ёславе, осьсяг олтэтэ магыс вотын ос хотал регын молях тах тославе. Ты пумыт тэлы порат лувыӈ суныл усь юв хартавет. Авторыг тит-хурум лувыӈ суныл пум тотнэ магыс махум ворн яланталэгыт.
Туи порат сав пил понсы: семыл ос выгыр сосыг, лям, морах, тахпил. Пил ватуӈкве сака пумысь. Няврамыт мань совтыт оньсегыт, пил молях ватэгыт: хотьют совтэ сартыннув тагиньты. Тысир ёӈим-кассым пил ватэгыт. Хунь сав саккар олы те, тонт пилытыл варенье пайтаве, саккар атим те, пилыт полям манн унттавет, тот оньсявет. Юв миннэ порат усь павылн тотавет.
Ос туи порат сав лахыс яныгми. Яныгнув няврамытн лахыс атэгыт. Сав лахыс те тэлы, лахсыт хот тославет.
Туи порат касын хотал хотпатн хул алысьлаӈкве эри. Пыгрисит этипалаг атяныл ёт хулпъегыт-толгегыт, хул солвалтэгыт; агирисит оманыл ёт хул сёпитэгыт: хор ос ёхыл варегыт, тослэгыт, пайтэгыт. Ворт сав кутюв олы, тан магсыланыл акторыг тит ветра хул пайтаве, польтаве, тувыл хул кутювытн усь уртаве. Тан тэнэ магыс янас путсовыт оньсегыт.
Туи порат сав рупата ворт олы. Хотал сыс махум акваг рупитэгыт, туп раквыӈ хотал варнэ порат махум усь усьлахтэгыт: кол тивырт юнсхатэгыт, послэгыт, мойт мойтэгыт, нэпак ловиньтэгыт, радио хунтлэгыт.
Пил ватнэ пора
Таквсы порат няврамыт исколан минэгыт. Ос ты порат суйпил понсы. Суйпил павыл похат яныгми, миннэ лёӈхе ати сака хоса. Маньнув няврамыт исколат хоталъят юи-палт – титыт сменат ханисьтахтэгыт, таимагыс Паял ос Света сясекватэн ёт алпыл ворын пил ватуӈкве яланталэг. Сясекватэн сысэн пайп таяты, магылъятэт совт оньси. Апыгрисяге мань совт оньсег, хотьют совтэ сартыннув пилыл ватытэ? Хунь совт тагынты, тонт пилыт пайпын сосавет. Исколан миннэ мус няврамыт пил ватэгыт.
Аквнакт Паял ос Света ювле миннэ лёӈхэн тох олыс. Сясекватэн тэнатэн лёӈх хултыс, няврамыг ювле та минмыгтасыг. Павыл сяр ляпат кос олы. Няврамыг сунсэг: тэн миннэ лёӈхент тит сёпыр алхатэг: нэматыр ат касалэг, нэматыр ат хулэг. Паял писале алмаяс, патамтас, акв сёпыр та хойвес. Титыт сёпыр эл тыламлас. Сёпыр сака яныг олыс. Няврамыг тит товлагентыл сёпыр маттем юв та хартыстэн. Тонт Паял туп сат талэ товлыс, Светан ат тал товлыс. Исколаныл няврамыг юв хультсыг.
Этипалаг, хунь оматэн рупатаныл ёхтыс, тэн сака ат лявыльттавесыг, Паял ёмас вармаль варыс: семьятэ магыс нёвыль катын паттыс.