Омам эрыг
Эрыг – ты латыӈ улпыл касыӈ маньси хотпан ёмасякв торгамтаве. Эрыг – эрнэ. Эрнэг олнэл магыс, эргыт аквписыг ты эргавет. Маныр пыл хотпа вари: рупиты ман усьлахты, сягтым ман тыстым олы, тэлы ман туя порат, аквписыг эргуӈкве таххаты.
Ос хунь овыл сёс хотпа эрыг хунтамлы? Хомус тонт тав номтэ олы?
Ам мань агииг ос олсум. Сяньтем ляпат ос унлахолсум. Овыл эрыг ам тавеныл хунтамласлум, эрыг хунтамлым – хот-люньсялтахтасум. Тысир ты вармаль ты олыс. Анумн тонт ат талтем туп олыс.
Кон – малтым туя хоталкве. Иснас коныпалт лямйив сёритаве. Лямйив тованэ халыл, луптанэ халыл юв, иснас тара посыӈ хоталкве сорниӈ атанэ тарталыянэ. Хотал посыт колкант аквтоп нас ёӈасэгыт.
Омам холтал колсориянэ варме юи-палт юнсхатуӈкве арталахты. Ам мот иснас похат мань, талква уласт унлахолэгум, оматем нупыл сунсэгум. Сыстам колканын тав салыг сов нортыс, хорамыӈ мань тучанэ ляпан вистэ, хансан яныгнув сов хургэ вистэ, юнсхатуӈкве та унтыс. Тав салыг котыл масьтырлы. Ханса юнты. Анумн татем пумысь омам каттеге нупыл сунсуӈкве ос юнсхатнэ суй хунтлаӈкве. Ты суйкве омам катаге варег, тавен юнтуп, туля, яӈкв ос сэмыл совыг, выгыр нуй тор аквторыг варуӈве нётэгыт.
Юнсхатым омам номсахты. Тованакт мось мовалалы, тованакт тыстувлы. Тувыл ам нуплум аӈкватас, ос ласьлакв эргэ овылтастэ. Маньси эргыт сав палэ эрыг сованыл касмосталыг олэгыт. Эрыг хунтамлым ам сымум татем хот-манумтас. Омам татем та салиг емтыс, аквтоп эрыг ёт тав сыме люньсис, аквтоп сымет татем-та сав тарвит олыс. Ам ласьлакв тав похатэн лаквтахтасум, ласьлакв лавсум: «Ома, ул эрген». Омам хот-мовалас, ос эргэ ат поилттастэ. Тонт ам таве анилаӈкве, вотгуӈкве патыслум, тувыл катпаттал тав питьмигаге лап-понитасагум, ты мус амти люньсюӈкве патсум. Омам юнсхатан утанэ хот-висанэ, анум сансын унттыстэ, ам ётум ёӈым – мовиньтаӈкве патыс.
Ман яныг семьят яныгмасув. Йийгрисянум овылсёс эрыг хунтамлым ос тысир капыртамыт. Ман ань манти нявраманыг емтсув, нявраманув ёт эргыт эргев. Ос тонт аманрыг наскасыг самвит соссув?
Яӈыг емтмув порат ман оматев юи-палт манти хайтыгтасув: «Ома, эрген. Ома, эрген». Тав эрганэ нэпакын хассанув, кассетан хассанув, сав кина послысув. Роман Татья эргуӈкве тортал масьтыр нэг олыс: лувын сунын унты – эрги, хапын унты – эрги, ялпыӈ хоталыт порат эрги, рупитан торыг эрги. Тав сака сав эрыг вас. Эрыг овылтан элы-палт тав эрыг варум хотпа лавитэ: «Ты эрыг сянюм мойтын тав сяне эрыг олыс» тувыл усь эргуӈкве паты. Эрыг эргын порат омам самвитанэ нэглэгыт, тох пес махманув йисыт миннэл хосыт посыӈ номтыл ты номаялавет, тан эрганыл элаль эргым.