Колтагыл
Ам омам
Ам омам наме Татья. Тав хотпатн лававе – Роман Татья. Тав охсар колыт рупиты. Охсар колыт сэмыл охсар янмалтаве, тот хот хотпа рупитэгыт. Касыӈ хотпа такви группа оньси. Омам группат яныг сат охсар олы. Касыӈ хотал кит сёс охсарыт тыттуӈкве эрегыт, тыи магыс тан магсыланыл тэнут варнэ хотпат тэнут пайтэгыт: хул ман нёвыль ос савсыр сыртэп. Ты тэнутыт акван равтавет, тувыл тув хул вой сосаве. Тамле тэнутыл охсарыт тыттавет. Хотал сыс охсарытн айнэ магыс аквсёс ос сыстам вит сосуӈкве эри. Тыи магыс касыӈ охсар янас тер аны оньси.
Ман – няврамыт акваг омавн нётмил варев: охсар аныт ловтэв, охсарытн вит сосэв ос охсар сёрыт хосъюпыл хосъгев. Сыстамыг акваг вос олыс.
Ам атям
Ам атям – хул алысьлан ос вораян хум. Тав наме Силька. Хотпатн лававе – Семан Силька. Тэлы-тув тав акваг хул алысьлым ос вораим яласы. Ворт тав такви павыл оньси, павлэ лававе – Нярпавыл. Павлэ похат яныг няр олы, тот тахпил, морах ос саӈквлыпил яныгми.
Тэлы порат атям савсыр уй-хул катын патталы: выгыр охсар, нёхс, лэӈын, сорп. Туи порат – хул алысьлы. Нярпавыл ляпат кит ярись овег: Посал-я ос Урай-я. Туяг атям ты ярисиг арпил лап-товартыяге, ты урыл тот сав хул атхаты. Туя сыс ты хул толгыл ос хулпыл алысьлаве. Пувим хул мотор хапыл Тагт павылн тотаве, тот рыбоучастокыт хул пирмайтаве.
Ам сясеквам
Сясеква – тыи атям тав оматэ. Ман таве сясекваг лавилув ос мирн лававе Матра эква. Ман сясеквавн янмалтавев. Омав ос атяв аквписыг рупитэг, ты урыл сясеквав манав сунсылым-уральтым олы. Алпыл тав тэнут пайты, ман тэпьялэв, тувыл исколан минэв. Хоталъят порат исколал юв ёхтэв, сясеквавн ос тыттавев, тувыл тав манавн савсыр пес йис потрыт потырты ос мойтыт мойты. Тав мойтанэ сака пумсит, элаль тах ты урыл ос хансэгум.
Сясеквав ман сака эруптылув, янытлылув. Тавеныл латыӈ хунтлэв, маныр тав лави – акваг варев: Тагтныл вит алумтэв, тэнэ юи-палыт аны ловтэв, колкан хосьгев. Таквсы порат тав ётэ касыӈ хотал ворн пил ватуӈкве ялантэв. Павыл похат сака сав суйпил ос савни яныгми.
Сясеквав пуӈке вотым, атанэ сяр туйт хурипат.
Ам увсим
Ам увсим наме Валя. Тав Нёрт самын патыс. Тоныт омав-атяв Нёрт салыг урим олсыг. Омам тав асе – Роман-ойка сака сав салыг оньсяс, тан акваг Нёрыт олсыт. Хунь Валя самын патыс, тоныт омав-атяв Тагт павылн вантласыг, тыт олмыгтасыг. Тыт пульница, искола, лапка олы.
Увсим маниг олме порат Тагт павылт исколат ханисьтахтас, тувыл Хальуст онтолов ос лов класс астлас, ты юи-палт Лениӈрад усн ханисьтахтуӈкве минас, тот кит институт астлас. Сартын няврам ханисьтан нэг сав тал рупитас, тувыл научный рупата варуӈкве патыс. Маньси мир олупса урыл диссертация хансыс, тав исторический наука кандидатыг олы. Санкт-Петербург уст студентыт ёт рупиты, тананыл маньси латыӈ ханисьты.
Ам каӈкагум
Ам кит каӈк оньсегум. Яныгнув каӈкум наме Слава. Маньнув каӈкум наме Паял. Хунь тэн яӈыг емтсыг, маньсит лавнэ сир – хум янытыг емтсыг – сас каӈкагум, атяв хольт, хул алысьлаӈкв ос вораяӈкв патсыг. Слава сыме вор нупыл хартаве, тав савнув савсыр уй катн патталы: сёпыр, сёльси, лэӈын, онтатыр, тованакт – яныг уй. Паял ос хул алысьлаӈкве масьтыр хум, туи порат сав хул пуви: сымри, сорт, сорх, касэв, яхул, хулюмхул.
Каӈкагум вораян ос хул алысьлан порат атяв унттум Нярпавылт олэг, ос колтаглаген Тагт павыл олэг. Туп туи порат, хунь няврамыт магыс каникул вараве, тоныт пуссын ворт олэгыт. Экватэнэн ос нявраманэн ёт пум варэгыт. Туи сыс сав пум варуӈкве эри: нила лув магыс ос хот мис магыс. Акв лувын нила тонна пум варуӈкве эри, акв мисын – хурум тонна.
Слава колтаглэт ат хотпа: тэн экватэнтыл ос хурум няврам (тит пыг ос акв аги); Паял колтаглэт онтолов хотпа: тэн экватэнтыл ос сат няврам (хурум пыг ос нила аги).
Ам йийтенум
Ман семьявт анумныл маньнуве хурум аги олы: Марина, Надя ос Нина. Марина маньтагыл ман семьявт яныгмас, тав нёлолов талэ товлум порат савалапыг хультыс. Агирисит мань порат садикын ялсыт, тувыл искола астласыт.
Марина Санкт-Петербург уст железнодорожный техникумыт ханисьтахтас, тувыл Луима мир институт тот астлас, Ань Сургут уст олы, луима мир центрыт кусяйиг рупиты.
Надя Ханты-Мансийск уст педучилище ос Югорский университет астлас, тав Хулюмсунт павылт олы, библиотекат рупиты.
Нина Югорский университетт ханисьтахтас, Тагт павылт олы, исколат рупиты.
Касыӈ йийтем танти колтагланылт акв пыг ос акв аги янмалтэгыт. Нявраманыл сака ёмасыт, мир нупыл ёмасякв сунсэгыт.
Ам олупсам
Ам ос яӈыг емтсум. Садикын ос исколан ялсум. Ханты-Мансийск уст медучилище астласум, лов тал леккарыг рупитасум. Тувыл Санкт-Петербург уст Луима мир институт астласум, аспирантура астласум. Филологический наука кандидатыг патсум. Ханты-Мансийск уст университет рупитэгум, студентыт маньси литературан ханисьтэгум. Акв пыг ос акв аги оньсегум.